மதமென்னும் பேய்…

‘Religion is regarded by the Common People as True,
by Wise as False and by Rulers as Useful’
                                                      – Seneca

பிறப்பால் நான் ஒரு கிருஸ்துவன்’ என்றார் எதிரிலிருந்த நண்பர்.

அவரது அறியாமையை நினைத்துப் பரிதாபமாக இருந்தது எனக்கு.

குழந்தை குழந்தையாகத்தான் பிறக்கிறது.
இங்கு எவரும் பிறக்கும்போதே ‘இந்து’வாகவும்,
‘இசுலாமிய’ராகவும்,
‘கிருஸ்தவ’ராகவும் பிறப்பதில்லை.

நான் பிறக்கும்போது என்னுடைய அப்பா
‘காந்தி காமராஜ் தேசியக் காங்கிரசில்’ (குமரி அனந்தனின் பழைய கட்சி) இருந்தார் என்பதற்காக நான் பிறக்கும்போதே கா.கா.தே.கா.வாகத்தான் பிறந்தேன் என்பது

எவ்வளவுக்கெவ்வளவு அபத்தமோ
அவ்வளவுக்கவ்வளவு அபத்தம்
நான் பிறப்பால் இந்துவென்பதும், முஸ்லிம் என்பதும்
இன்னபிற இத்யாதிகளென்பதும்.

தமிழக அரசின் கட்டாய மதமாற்றத் தடைச் சட்டப்படி
உண்மையில் ‘கம்பி எண்ண’ வைக்கப்பட வேண்டியவர்கள்
உலகெங்கிலும் உள்ள பெற்றோர்கள்தான்.

எந்தவித தத்துவப் பின்னணிகளும்
அரசியல் சித்தாந்தங்களும்
மத எண்ணங்களும இன்றிதான்
ஒரு உயிர் உதிக்கிறது இந்த மண்ணின் மடியில்.

உண்மையான கட்டாய மதத் திணிப்பு
மழலைப் பருவத்திலேயே ஆரம்பித்துவிடுகிறது.
அதுவும் பெற்றோர்களால்.

மதம் தானாய் மாறுவது –
மாற்றப்படுவது –
மாறாமலே இருப்பது என்கின்ற விஷயங்களையும் தாண்டி
நாம் கவனிக்க வேண்டியவை சிலதும் இருக்கின்றன.

அதுதான்: மதத்தைத் தேர்வு செய்யும் உரிமை (Right to Choose)
எப்படி இந்த நாட்டின் ‘இறையாண்மையையே’ காப்பாற்றுவதற்கு
ஒருவருக்கு வயது வரம்பு நிர்ணயிக்கப்பட்டிருக்கிறதோ…
அப்படி மதத்தைத் தேர்வு செய்வதற்கும் வயது வரம்பு தேவை
என்பது எனது கருத்து.

இந்த நாட்டில் இல்லாத ‘ஜனநாயகத்தையே’ தூக்கி நிறுத்துவதற்கு
எப்படி 18 வயது நிச்சயிக்கப்பட்டிருக்கிறதோ
அதைப் போன்றே… இல்லாத மதங்களை தீர்மானிப்பதற்கும்
வயது தேவை என்பதுதான் சரியானது.

ஐந்து ஆண்டுகளுக்கு ஒருமுறை
அரசியல் கட்சிகளது தேர்தல் அறிக்கைகளையோ
எந்தக் கர்மத்தையோ ‘அலசிப்பார்த்து’ ஓட்டுப் போடுவதைப் போல
சகல மதங்களின் யோக்யதைகளையும் உரசிப் பார்த்து தீர்மானிப்பதே உத்தமமான விஷயம்.

இதில் கட்சிகளும் மதங்களும் நம்மை முடிந்தளவிற்கு மடையர்களாக்குகின்றன.

இந்தத் ‘தேர்ந்தெடுக்கும்’ விளையாட்டில் சலிப்புற்று
‘தேர்தல் பாதை திருடர் பாதை’ என்று நிராகரிப்பதைப் போல
‘எம்மதமும் சம்மதமில்லை’ எனத் தீர்மானிக்கும் உரிமையும் இதில் உள்ளடக்கம்.

கொஞ்சம் பின்னோக்கிப் பார்த்தால்…

‘மதம் மக்களுக்கு அபின்’ என்ற மார்க்கம்…

‘மதம் மக்களுக்கு விஷம்’ என்ற ஈ.வே.ராமசாமியும்…

‘நால் வருணம் ஆசிரமம் ஆசாரம் முதலா
நவின்றகலைச் சரிதமெலாம் பிள்ளை விளையாட்டே…’ என்ற வள்ளலாரும்…

இன்று இருந்திருந்தால்…

‘பாகிஸ்தானின் கைக்கூலி’யாகவோ…
‘மதத்துரோகியாகவோ சித்தரிக்கப்பட்டிருப்பார்கள்.
அல்லது ‘இந்திய ஒருமைப்பாட்டிற்கு’ ஊறு விளைவித்ததாகக் கூறி
தடாவிலோ… பொடாவிலோ உள்ளே தள்ளப்பட்டிருப்பார்கள்.

மொத்தத்தில் எல்லா மதங்களுமே அம்பலப்பட்டு நிற்பது
பெண்கள் விஷயத்தில்தான்.

என்னதான் மதங்கள் சமத்துவம் – சகோதரத்துவம் – அன்பு
என ஓலமிட்டாலும் பெண்களைப் பொறுத்தவரை
இவர்கள் எண்ணம் – செயல் எல்லாம் ஒன்றுதான்.
இவைகள் அனைத்தும் ஒரே குரலில்
ஆணாதிக்கத்தையே பறைசாற்றுகின்றன என்பதுதான் உண்மை.

என்னதான் பைபிளைக் கரைத்துக் குடித்தாலும்
ஒரு பெண் போப்பாக முடியாது.

என்னதான் நான்கு வேதமோ நாற்பத்தேழு மந்திரமோ நுனி நாக்கில் வைத்திருந்தாலும்
ஒரு பெண் மடாதிபதியாகவோ, சங்கராச்சாரியாகவோ முடியாது.

என்னதான் குர்ரானைத் தலைகீழாக ஒப்பித்தாலும்
ஒரு பெண் மெளலவியாகவோ, இமாமாகவோ முடியாது.

ஏனெனில், மனித குல விடுதலைக்கான நெடிய போராட்டத்தில்
இம்மதங்கள் என்றுமே பெண்களுக்கு எதிராகவே அணிவகுத்திருக்கின்றன.
மதங்களைச் சுற்றி என்னத்தான் ‘தத்துவப்’ புணுகு பூசினாலும்
நெற்றி அடியாய் என்னைச் சுற்றிச்சுற்றி வருபவை இரண்டே இரண்டு வரிகள் தான்.

‘மதத்தை மிதி.
மனிதனை மதி’

என்பதே அது.

மதவாதிகள் மனிதனைக் கொன்றுவிட்டு
கடவுளைத் தேடிக் கொண்டிருக்கிறார்கள்.

கடவுளோ மதக் கலவரங்களில்
தான் கொல்லப்படாமலிருப்பதற்காக
நாத்திகர்களது கதவைத் தட்டிக் கொண்டிருக்கிறார்.

பாவம் கடவுள்.

நன்றி: தீராநதி 2002

Advertisements

11 thoughts on “மதமென்னும் பேய்…

  1. பிறக்கும்போது திணிக்கப்படும் இந்த விசயம் பிற்காலத்தில் சுய அரிவி வ்ந்தவுடனும் மாறுவது இல்லை. சிந்தனை கழற்றப்படுகிறது.
    **
    குழந்தைகளுக்கு மதங்களைத் தேர்ந்தெடுக்கும் உரிமை அவசியம் வேண்டும்.
    **
    இதை எப்படி நடை முறைப்படுத்துவது?
    **
    குப்பையை எங்கே போட வேண்டும் என்று சொல்லித்தரத தெரியாத இந்த கூமுட்டை பெற்றோர்களால் இது போன்ற கருத்தை உள்வாங்கிக் கொள்ள முடியாது.
    **
    மகன்: தப்புச் செய்தா சாமி தண்டனை கொடுப்பார் என்று அம்மா சொல்கிறார்களே?

    நான்: சாமி எனபது சிறு குழந்தைகளுக்கு டீச்சர் மாதிரி. அல்லது ட்ராபிக் போலீஸ் மாதிரி. அவர் இருக்கிறார் என்று எண்ணி நீ தவறு செய்யாமல் (பென்சிலைக் கடித்தல், தங்கச்சியின் பொம்மையை உடைத்தல்) இருந்தால் போதும். நீ பெரியவன் ஆனதும் அவர் உன்னை விட்டுவிட்டு வேறு குழந்தைகளைப் பார்க்கச் சென்றுவிடுவார்.

    உலகில் பல கடவுள்கள் இருக்கிறார்கள். இவர்கள் எல்லாம் போகோ டிவியில் வரும் கார்ட்டூன்கள் போலத்தான்.விருப்பமான கார்ட்டூன்களை நாமே உருவாக்கிக் கொள்ளலாம். எந்த அளவுக்கு சூப்பர்மேனும் ஸ்பைடர்மேனையும் நம்புகிறாயோ அந்த அளவுக்கும் குறைவாகவே இவர்களை நம்ப வேண்டும்.

    உனக்கு 10 வயது ஆகும் போது இதைப் பற்றி விரிவாகப் பேசுகிறேன்.. அதுவரை நீ எந்த மதத்தையும் சாராதவனே.

  2. ( மதத்தைத் தேர்வு செய்யும் உரிமை (Right to Choose)
    எப்படி இந்த நாட்டின் ‘இறையாண்மையையே’ காப்பாற்றுவதற்கு
    ஒருவருக்கு வயது வரம்பு நிர்ணயிக்கப்பட்டிருக்கிறதோ…
    அப்படி மதத்தைத் தேர்வு செய்வதற்கும் வயது வரம்பு தேவை
    என்பது எனது கருத்து)

    மிக சரியாக சொல்லியிருக்கீங்க நண்பரே..
    தொடர்ந்து இதுபோல் நிறைய எழுதுங்கள்.வாழ்த்துகள்!

  3. மதம் இருக்கும் வரை மனிதன் முன்னேற முடியாது.

  4. //தமிழக அரசின் கட்டாய மதமாற்றத் தடைச் சட்டப்படி
    உண்மையில் ‘கம்பி எண்ண’ வைக்கப்பட வேண்டியவர்கள்
    உலகெங்கிலும் உள்ள பெற்றோர்கள்தான்.

    எந்தவித தத்துவப் பின்னணிகளும்
    அரசியல் சித்தாந்தங்களும்
    மத எண்ணங்களும இன்றிதான்
    ஒரு உயிர் உதிக்கிறது இந்த மண்ணின் மடியில்.

    உண்மையான கட்டாய மதத் திணிப்பு
    மழலைப் பருவத்திலேயே ஆரம்பித்துவிடுகிறது.
    அதுவும் பெற்றோர்களால்.//

    மிகத் தெளிவான “நறுக்” வரிகள். வெறுமையாய் இருக்கும் குழந்தை மனதில் இவர்களே கருத்தை உருவாக்கி வைத்து விட்டு இறுதி வரை அதை சுரண்டலுக்கு ஆட்படுத்தும் பெற்றோரை என்ன செய்யலாம்?
    ஏற்கனவே அச்சில் படித்த கட்டுரை ஆயினும், மீண்டும் படிக்கத் தந்ததற்கு நன்றி..

  5. //குழந்தை குழந்தையாகத்தான் பிறக்கிறது.
    இங்கு எவரும் பிறக்கும்போதே ‘இந்து’வாகவும்,
    ‘இசுலாமிய’ராகவும்,
    ‘கிருஸ்தவ’ராகவும் பிறப்பதில்லை.

    எந்தவித தத்துவப் பின்னணிகளும்
    அரசியல் சித்தாந்தங்களும்
    மத எண்ணங்களும இன்றிதான்
    ஒரு உயிர் உதிக்கிறது இந்த மண்ணின் மடியில்.//

    மிகவும் அற்புதமாக சொல்லியிருக்கிறீர்கள்…… அப்பாவி மக்களை மதத்தின் பெயரால் மழுங்கடித்துக் கொண்டிருப்பவர்களை என்ன செய்வது….. எழுதுவதோடு நம் வேலை முடிந்து விட்டதா…… என்ன செய்யலாம்…… தோழர்கள் அனைவரையும் ஒன்று திரட்டி ஒரு புதிய சமுதாயத்திற்க்கு அடித்தளமிட்டால் என்ன….. நான் தயார்……மதம் மட்டுமல்ல சினிமா, கலாச்சாரம், அரசியல்………..

  6. // என்னதான் குர்ரானைத் தலைகீழாக ஒப்பித்தாலும்
    ஒரு பெண் மெளலவியாகவோ, இமாமாகவோ முடியாது.//

    அன்பின் பாமரன்.

    பகுத்தறியும் நோக்கில் எழுதப்பட்ட உங்கள் சொற்களுக்கு நன்றி.

    நான் மேற்கோளிட்டுள்ள தங்கள் கருத்து முற்றிலும் பிழையானது.

    குர்ஆனை மனப்பாடமாக ஒப்பிப்பவர்களை அரபியில் ஹாஃபிழ் என்பர். அதன் தமிழாக்கம் பாதுகாப்பவர் என்பது.
    குர்ஆனை மனனம் செய்த கணக்கற்ற பெண்மணிகள் இந்த உலகில் வாழ்ந்து வருகின்றனர்.

    மௌலவி என்பது இஸ்லாமிய அறிவுக்கருவூலங்களைப் படிப்பதன் மூலம் வழங்கப்படும் பட்டம். இப்போது அந்தப் பட்டம் பெற்ற பெண்களும் அனேகம் பேர் உலகில் உண்டு.

    தங்களின் கருத்துக்கு எதிர்விளை கொடுப்பது என் நோக்கமல்ல.
    இஸ்லாத்தில் பெண்கள் அறிஞர்களாகும் உரிமை இஸ்லாத்தில் எப்போதும் உண்டு.

  7. //இங்கு எவரும் பிறக்கும்போதே ‘இந்து’வாகவும்,
    ‘இசுலாமிய’ராகவும்,
    ‘கிருஸ்தவ’ராகவும் பிறப்பதில்லை.//

    சிந்திக்க வைக்கம் எழுத்து…

    மனிதன் வாழ
    மதம் அன்று
    மதம் வாழ
    மனிதன் இன்று…

    தினேஷ்

  8. நண்பர் பாமரன் ஒரு முறை இஸ்லாத்தை முழுவதுமாக அதன் கருத்துகளை அறிந்து கொண்டால் நல்லது என்று எண்ணுகிறேன் ,இங்கு பெண்களும் (இமாம்) மார்க்க அறிஞர் ஆகலாம்,தாங்கள் குழந்தைகள் பற்றி சொன்ன கருத்துதான் இஸ்லாமின் கருத்தும்,ஒரு நபி மொழி கூறுவதை பாருங்கள் ” எல்லா குழந்தைகளும் இயற்கை மார்கத்திலேதான் பிறக்கின்றன அதை அதன் பெற்றோர்கள்தான் யூதர்களாகவும்,கிறிஸ்தவர்களாகவும்,நெருப்பு வணங்கிகள் ஆகவும் மாற்றி விடுகின்றனர்” என்று முஹம்மத் நபி (அவர்களுக்கு சாந்தி சமாதனம் உண்டாகட்டும்) கூறினார்கள்,(புஹாரி 1359)ஒன்றே குலம் ஒருவனே தேவன் என்பதுதான் இஸ்லாம்,மேலும் தாங்கள் விஜய் தொலைக்காட்சியில் (நீயா நானா)தமிழ் பெயர் யாருமே இஸ்லாமியர் உட்பட வைப்பது இல்லை என்றும்
    கூறினீர்கள்,என் பெயர் தமிழ் வேந்தன் என்று வைத்தால் என்னுடைய ஜாதி என்னவாக இருக்கும் என்று என்னிடம் பழகும் அனைவருக்கும் மண்டையில் குடைச்சல் எடுக்குமே ? என் பெயர் “அஹ்மத்” இல்லை “அப்துல்” என்று சொன்னால் “ஒ பாயா” என்று ஜாதியை பற்றி யோசிக்காமல் செல்வானே,இதன் மூலம் இந்த அசிங்கத்தை,சமூக அவலத்தை ஒழிக்கிறோம்,இதில் தங்களுக்கு உடன்பாடு இல்லையா ???
    சமூக அவலம் நீங்க இஸ்லாத்தில் இணைந்து விடுங்கள் என்று பெரியார் சொன்னாரே ஏன் நீங்கள் சமூக அவலத்தை நீக்க முன் வரவில்லை?பெரியாரிசம் பேசும், போற்றும் நீங்கள் ஏன் அதை நடைமுறைபடுத்த மாட்டேன் என்று பிடிவாதம் செய்கிறீர்கள் பாமரன் ?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s