கமல்ஹாசன்

திரு கமல்ஹாசன் அவர்களைப் பேட்டி கண்டு
எந்த மனநலப் பாதிப்பும் ஏற்படாமல்
வீடு திரும்பிய நியூஸ் 18 நெறியாளர்
குணசேகரன் அவர்களுக்கு
மனம் நிறைந்த வாழ்த்துக்கள்.

Advertisements

பேரன்பு


புதிர்கள் நிறைந்த இவ்வாழ்வில்
எவர்மீதும் புகார்கள் இல்லை இவனுக்கு.
.
அன்பினை வார்த்தைகளால்
விளக்கிவிட முடியுமா என்ன?
அதுவும் பேரன்பினை….?
.
பாப்பாவும்… மீராவும்…
விஜயலட்சுமியும்…. அமுதவனும்….
நெயில் பாலீஷும்…. அந்தச் சிட்டுக் குருவியும்
என்னில் சுழன்றபடி இருக்கிறார்கள் இன்னமும்.
.
பெருமகிழ்ச்சி ராம்.

பேட்ட…விஸ்வாசம்….


Hi…. Dude….!

பேட்டையும்….

விஸ்வாசமும் மட்டுமல்ல….
.
நேத்து மோடி மாமா
உங்க பரம்பரைக்கே
பத்து பர்செண்ட் மூலமா
ஆப்பு வெச்சாரில்ல…
அதுதான்யா “தரமான” சம்பவம்.
.
நீ கட்டவுட்டுக்கு பால் ஊத்துனே
அவுங்க உன் மொத்த தலைமுறைக்கே ஊத்தீட்டாங்க.
.
Cool மச்சி… Cool.

முட்டாள்…

முட்டாள் என்று கூகுளில் தேடினாலே
அமெரிக்கப் புர்ர்ச்ச்சியாளர் டொனால்ட் ட்ரம்ப்பின்
“திருமுகம்”தான் கண்சிமிட்டுகிறது.
.
இதைப் பார்த்ததும் ஒரு கதைதான்
என் நினைவுக்கு வருகிறது…..
.
அது….
.
‘சொர்க்கத்தின் வாசலில்’ அன்று ஏகப்பட்ட கூட்டம்.
வாசலில் நின்று கொண்டிருந்த
கடவுளின் ஏஜெண்ட் ஒவ்வொருவரையும்
யார் என்று விசாரித்த பிறகே
உள்ளே அனுப்பிக் கொண்டிருந்தார்.
.
முதலில் எதிர்ப்பட்ட ஐன்ஸ்டீனிடம்…..
.
“நீங்கள்தான் உண்மையான ஐன்ஸ்டீன் என்பதை
எப்படி நம்புவது? நிரூபித்துக் காட்டுங்கள்”
என்று கூற….
.
“எனக்கொரு கரும்பலகையையும், சாக்பீசையும்
கொடுங்கள். நிரூபித்துக் காட்டுகிறேன்”
என்றார் ஐன்ஸ்டீன்.
.
இரண்டும் கொடுக்கப்பட்டது.
.
ஆற்றல்….நிறை….என ஏதேதோ கணக்குப் போட்டு
தான் கண்டுபிடித்த E = MC 2 என்கிற
பார்முலாவை நிரூபித்துக் காட்ட….
.
“அட…நீங்க உண்மையிலேயே
ஐன்ஸ்டீன் தான். உள்ளே போங்கள்” என்று
வழிவிட்டார் கடவுளின் ஏஜெண்ட்.
.
அடுத்து வந்தவரோ உலகப் புகழ் பெற்ற
ஓவியர் பிக்காசோ.
.
அவரையும் நிரூபித்துக் காட்டச் சொல்ல…
பிக்காசோ கரும்பலகையில் முன்னர் ஐன்ஸ்டீன்
எழுதியிருந்த சூத்திரத்தை அழித்துவிட்டு
வரையத் தொடங்கினார்.
.
அவர் வரைந்த அற்புதமான ஓவியங்களைப் பார்த்ததும்
மகிழ்ச்சிப் பெருக்கில் அப்படியே கட்டித் தழுவி….
“நீங்க மாபெரும் கலைஞர் பிக்காசோதான்.
நம்புகிறேன். உள்ளே போங்கள்” என்று வழி விட்டார் க.ஏ.
.
அடுத்து வந்து நின்றவர்
மற்றவர்களைப் போல் இல்லை.
.
அவர் ஒரு மகா மேதை.
.
ஆனால்…
அவரோ காவலுக்கு நின்றவரைத்
தள்ளிவிட்டு விட்டு உள்ளே போக முயற்சிக்க….
.
“முதலில் நீங்கள் யாரென்று சொல்லி
நிரூபியுங்கள். அப்புறம் அனுமதிக்கிறேன்”
என்று கடவுள் ஏஜெண்ட் கடுப்புடன் கூற….
.
“நான் தான் டொனால்ட் டிரம்ப் ”
என்றார் டிரம்ப்.
.
“சரி நீங்கள்தான் டொனால்ட் டிரம்ப் என்பதை
எப்படி நம்புவது?
உங்கள் அறிவுத் திறமையால்
உங்களை நிரூபித்துக் காட்டுங்கள்” என்றார் க.ஏ.
.
“எப்படி நிரூபிப்பது?” என்று
மீண்டும் டிரம்ப் கேட்க…
.
“உங்களுக்கு முன்பு வந்த
ஐன்ஸ்டீனும்….பிக்காசோவும்
எப்படி நிரூபித்தார்களோ அப்படி”
என்றார் கடவுளின் ஏஜெண்ட்.
.
“அது சரி…
யார் அந்த ஐன்ஸ்டீனும்…..பிக்காசோவும்?”
என்றார் டொனால்ட் டிரம்ப்.
.
“இம்புட்டு “அறிவு” இருக்குன்னா….
சந்தேகமேயில்லை நீங்க டொனால்ட் டிரம்ப்பேதான்…
உள்ளே போங்கள்” என்று
கதவுகளை அகலத் திறந்துவிட்டபடி
வெளியில் குதித்தோடினார் கடவுளின் ஏஜெண்ட்.

இனிய கலைஞருக்கு….!


இனிய கலைஞருக்கு….!

இது எனது இரண்டாவது மடல்.
முதல் மடல் நினைவிருக்க வாய்ப்பில்லை உங்களுக்கு.
.
அது எனது கல்லூரிப் பருவத்தின்போது
தங்களது வருகைக்காகத் தவமிருந்து எழுதிய மடல்.
.
அன்று தங்களை நேசித்த லட்சக்கணக்கான
தமிழ் பேசும் மக்களில் ஒருவனாக நானும் இருந்தேன்.
.
அப்போது மட்டுமில்லை அதற்கும் முன்னர்
அவசரகால அடக்குமுறைகளின்போது
எங்கள் ஊர் மாநாட்டில் நீங்கள் :
.
“இந்தக் கொடுமைகளைக் கண்டித்து
இந்தியப் பிரதமருக்கு நாளையே
லட்சக்கணக்கான தந்திகள் பறந்தாக வேண்டும்.

எங்கே…..
இங்குள்ளவர்களில் எத்தனை பேர்
அனுப்பப் போகிறீர்கள்?
கரங்களை உயர்த்துங்கள் பார்க்கலாம்…”
.
எனச் சூளுரைத்தபோது உயர்ந்த
லட்சக்கணக்கான கரங்களில்
தந்தையுடனிருந்த பதினான்கு வயதுச் சிறுவனான
எனது கரமும் இருந்தது
இன்னமும் நினைவில்தான்….
.
அவசரகாலக் கொடுமைகளின்போது
கழகத்தவர்கள் கைது செய்யப்படும் போதெல்லாம்
தணிக்கைக்குத் தப்பித்து முரசொலியில் வெளிவரும்
“அண்ணா சமாதிக்கு வர இயலாதவர்கள்
பட்டியலை”ப் பார்த்து கலங்கிய காலங்களும்
இன்னமும் நினைவில்தான்…
.
செத்தால்கூட கறுப்பு சிகப்பில்தான்
என் உடலைப் போர்த்த வேண்டும்
என நெருங்கியவர்களிடமெல்லாம்
நெக்குறுகக் கூறித்திரிந்ததும்
இன்னமும் நினைவில்தான்….
.
இருப்பினும் இனியவரே !
இடைப்பட்ட காலத்தில்
எப்படி ஏற்பட்டது நமக்குள் இடைவெளி…?

அதுவும்
இன்னமும் நினைவில்தான்…

“நிலையான ஆட்சிக்காக” நமது கழகம்
“நிலை” மாறியபோது
திசை மாறிய இளைஞர்களில் நானும் ஒருவன்.

இன்று அமர்ந்திருக்கும் அரியாசனம் பற்றியும்
அதிலிருந்து கொண்டு அப்படியொன்றும்
எம் மக்களது வாழ்க்கைக்கு விடிவினை
வரவழைத்துவிட முடியாது என்பது பற்றியும்
எம்மைக் காட்டிலும் தங்களுக்குத் தெரியும்.
.
அமர்ந்திருக்கின்ற அரியாசனம் அப்படி.
அதற்கான அதிகாரங்களும் அப்படி.
அமுலில் உள்ள அமைப்பும் அப்படி.
.
அப்படியானால் எப்படித்தான் விடியும்?
ஓட்டுச்சாவடிகளில் விடியாது
என்பதனைப் புரிந்து நாட்கள் பலவாயிற்று.
.
இருப்பினும் குறளோவியம் கொடுத்தவருக்கு குறளாய் ஒன்று :

“இதனை இதனால் இவன்முடிக்கும் என்றாய்ந்து
அதனை அவன்கண் விடல்.”
.
புரியும் உங்களுக்கு.
நேரடியாகவே வருவோமே விஷயத்திற்கு.
.
உங்கள் சக்தி எமக்குப் புரியும்.
எனவே சொன்னதை செய்து முடிப்பீர்கள்
எனும் நம்பிக்கையில்…….
.
கஞ்சியோ கூழோ குடித்துக் காலத்தைத் தள்ளுகின்ற
கூடங்குளத்து மக்களை கூண்டோடு ஒழிக்க
கூட்டுத் தயாரிப்பில் தலை நீட்டுகின்ற
உலைகள் பற்றி உணர்வீர்கள்
.
”உண்மை நிலை அறிய “நிபுணர்” குழு
அமைப்போம்” என்ற அறிவிப்பினைக்
கேட்டதும் மகிழ்ந்து போனோம்.

ஆனால் அந்த “நிபுணர்” குழுவும்
அரசாங்க நிபுணர்களாக மட்டும் இருப்பின்
நமது வானொலிச் செய்திகளைப் போல
“பொய்கள் வாசிப்பதாகத்தான்” இருக்கும்.
.
தொலைக்காட்சியின் துடுக்குத்தனத்தை உணர்த்த
அதனை சுத்தியலால் சுக்குநூறாக
உடைத்துக் காட்டிய உங்களுக்கா இது தெரியாது?
.
மாற்றுக்கட்சிகள் மாநிலத்தில் ஆளும்போது
மத்திய அரசு மாற்றாந்தாயாகத்தான் இருக்கும் என்பது
மாநிலங்களின் சுய ஆட்சிக்காக அன்றே
அறைகூவல் விடுத்த உங்களுக்கா புரியாது ?
.
கலைக்கப்பட்ட கர்நாடக அரசு
கைகாவில் அணு உலைகள் அமைப்பது பற்றி
விவாதிக்க நாடு தழுவிய விவாதத்தை வைத்தது.
.
விவாதத்தை வைத்தது கர்நாடக அரசு.
விவாதத்தை வெறுத்தது இந்திய அரசு.
.
குளிரூட்டப்பட்ட அறைகளினுள்ளே
ஆராய்ச்சி நடத்திக் கொண்டிருந்த விஞ்ஞானிகள்
விவாதத்திற்காக வீதிக்கு வரவழைக்கப்பட்டார்கள்.
.
அக்கூட்டத்தில், ”ஆக்கபூர்வத்திற்கான” அணுசக்தி
என்பதனை வாதத்திற்காக ஏற்றுக் கொண்டாலும்கூட
“அரங்கேற” இருக்கும் அபாயங்கள் பற்றி
அவர்கள் மறுக்கவில்லை.
அத்துணை விலை கொடுத்து அபாயங்களைச்
சந்திக்கத்தான் வேண்டுமா என்றதற்கு
பதிலும் கூறவில்லை.
.
இருப்பினும் கலைஞர் அவர்களே !

இது வெறும் ஆபத்து பற்றிய பிரச்சனை மட்டுமல்ல.
ஆம்.
இது தமிழ்க் கலாச்சாரத்துக்கு எதிராக
விஞ்ஞானம் போர்த்திய விவேக வலை.
.
இச்சதியில் இருந்து நம் மக்களைக் காப்பாற்றும் பொறுப்பு
தங்களுக்கு உள்ளதனைத்
தாங்கள் மறுக்கவும் மாட்டீர்கள்,
மறக்கவும் மாட்டீர்கள்.
.
இனி இங்கிலாந்து பற்றிப் பார்ப்போமா?

இங்கிலாந்திலுள்ள செல்லாஃபீல்டு
அணு எரிபொருள் மறுபதன நிலையத்தை
விரிவாக்குவதா? என விவாதம் நடந்ததில்,
அந்நாட்டு நாடாளுமன்ற உறுப்பினர்கள்
அந்நிலையத்தை விரிவாக்குவதை விடவும்
முடிவாக்குவதே சரியென பரிந்துரைத்துள்ளதனைத்
தங்கள் பார்வைக்குக் கொண்டு வருவது
பொருத்தமாக இருக்கும் என எண்ணுகிறோம்.
.
பத்துமணி நேரத்திற்குள்
பல லட்சம் மக்களைத் திரட்டும் பலம்
உங்களுக்கு இருப்பதனை
நீங்கள் உணர்ந்ததாகத் தெரியவில்லை.

ஆட்சியைப் பிடிப்பதிலும் பின்னர்
அதனைத் தக்கவைத்துக் கொள்வதிலுமே
பெரும்பாலான பொழுதுகள் போயாயிற்று.
.
அந்தப் பதினாறுகளில் உங்களின் எழுத்துக்களுக்கும்
இந்த அறுபதுகளில் உங்களின் எழுத்துக்களுக்கும்
எத்தனை இடைவெளி……
இப்பொழுது இல்லாது போனது
எதுவெனப் புரிகிறதா உங்களுக்கு….?
.
காலக்குதிரையைத்தான் கழுத்தைத் திருப்ப விடுங்களேன்….
புரியும் உங்களுக்கு…..
.
அதுதான் ”அந்த அசாத்திய துணிச்சல்”.
.
தமிழகத்தின் மூலை முடுக்குகளையெல்லாம்
அறிந்து வைத்திருப்பீர்கள்.
அத்தோடு மட்டுமில்லை
அம்மக்களது பழக்க வழக்கங்களையும் கூடத்தான்….
அப்படிப்பட்ட உங்களுக்கா தெரியாது
கூடங்குளத்தில் அணு உலைகள் அபாயகரமானதென்று ?
.
இருப்பினும் முதல்வரே !
.
படுபாதக உலைகள் பல்லாயிரம் மக்களைப்
பலிவாங்கி விடுமென்று பாராளுமன்றத்தில்
வை.கோபால்சாமி முழங்கினாரே….
.
அதனைக் கழக ஏடு கொட்டை எழுத்தில்
கோடிட்டுக் காட்டியதே….
.
சாத்தான்குளத்தின் கழக வேட்பாளர்
”அணு உலைகளை அமைக்க விட மாட்டோம்” என
அடித்துச் சத்தியம் செய்தாரே….
.
ஆனால்…. இன்று….?
.
“சாதக பாதகம்” என்று நீங்களும்….
.
“புரளி கிளப்புபவர்கள்” எனக் கழக ஏடும்….
.
முறைதானா…. முதல்வரே….?
.
ஒருவேளை….
போக்கற்றவர்களின் பொழுது போக்கிடம்தான் பாராளுமன்றம்
எனப் புரியவைப்பதற்குத்தான் பேசியதோ பாராளுமன்றப் புலி?
.
சாத்தான்குளச் சத்தியவான் இதனையும்
சட்டமன்றச் சத்தியப் பிரமாணமாய் நினைத்து விட்டாரோ?
.
உங்கள் தோளில் தொங்கிக் கொண்டிருக்கும்
”தோழமை”க் கட்சிகளின் தொந்திரவும்
தெரியும் எமக்கு.
.
அத்தலைமைகளின் “நிலை”மையும்
தெரியும் எமக்கு.
.
இருப்பினும் முதல்வரே….!
இந்திப் பிரச்சனையிலிருந்து
ஈழப்பிரச்சனை வரையிலும்
தூர நின்ற “தோழமை”களா
தொந்தரவு தந்து விட முடியும்?
.
எனவே கலைஞர் அவர்களே….!
.
தமிழகத்தில் மட்டுமில்லை….
மற்ற தென் மாநிலங்களில்கூட
தலை நீட்டும் உலைகளைத் துரத்தியடிக்கும்
ஆற்றல் உங்களுக்குண்டு.
.
ஆகவே….
”நடந்தவை நடந்தவையாக இருக்கட்டும்
இனி நடப்பவை நல்லவையாக இருக்கட்டும்” என
அடிக்கடி நீங்கள் நினைவூட்டும்
அதே வரிகளைத்தான் நாங்களும்
நினைவூட்ட விரும்புகிறோம்.
.
ஆம்….
.
“அமைச்சர் பொறுப்பை ஏற்றுக்கொள் என்றாலும்
தண்டவாளத்தில் தலை வைத்துப்படு என்றாலும்
தம்பி கருணாநிதி செய்து முடிப்பான்.”
என அண்ணா சொன்னார்.
.
இனிய முதல்வரே….!
.
நீங்கள்
தண்டவாளத்தில் தலையையும்
வைக்க வேண்டாம்.

கூடங்குளத்தில் உலையையும்
வைக்க வேண்டாம்

எனும் வேண்டுகோளோடு
விடை பெறுவது…….

………பாமரன்.

(1990 இல் வெளிவந்த எனது “புத்தர் சிரித்தார்” நூலில் இருந்து….)

” AGNI “ புத்திரிகள்…

” AGNI “ புத்திரிகள்.
====================

ஆபாச ஒழிப்புக் கழகம் ஒன்றை ஆரம்பித்து
அதற்கு புஷ்பா தங்கதுரை, ராஜேந்திரகுமார்
வகையறாக்கள் தலைமை தாங்கினால்…
.
சீனியர், ஜூனியர், சப்ஜூனியர் சங்கராச்சாரிகள்
அறிவியல் அறிஞர்களின் மாநாட்டிற்குத்
தலைமை வகித்தால்….
.
ஜெயவர்த்தனே மனித உரிமை
மீறல்களைக் கண்டித்து முழங்கினால்…
.
துக்ளக் சோ பொதுவுடைமைச் சமுதாயம்
பற்றிப் பிரச்சாரம் செய்தால்…
.
எவ்வளவு அபத்தமாக இருக்குமோ
அவ்வளவு அபத்தமானது இந்த சிவசங்கரி
நடத்திவரும் “அக்னி” இயக்கம் (?).
(Authors Guild for National Integrity – AGNI )
.
ஏழை மக்களின் துயர் துடைக்க
இரவு பகல் பாராது தனது பேனாவில்
கண்ணீரை நிரப்பிக் கொண்டு
எழுதும் சிவசங்கரி….
.
பரம ஏழை ப. சிதம்பரம்….
.
ஓய்வுநேரப் புரட்சியாளர் மாலன்…
.
இப்படி இந்த வகையறாக்கள் இணைந்து
சென்னையிலுள்ள பிரமாண்டமான
பாம்குரோவ் ஓட்டலில் இந்திய மக்களின்
ஒருமைப்பாட்டுக்காக ஒப்பாரி வைத்தார்கள்
“அக்னி” விழாவில்.
.
தனது கதைகளில் குடிகாரக் கணவனையும்,
கொடுமைக்கார கணவனையும் வைத்தே
தனது காலத்தை ஓட்டும் சிவசங்கரி….

இந்தச் சமுதாயம்
யார் கைகளில் இருக்கிறது…?
.
இந்த மக்களின் ‘குடிக்கு’ப் பின்னால்
குடியிருக்கும் குற்றவாளிகள் யார்…?
.
அவர்கள் மட்டும் எப்படி வேட்டி அவிழாமல்,
ஜரிகை வேட்டியும், மைனர் செயினுமாய்
சமூகத்தில் “பெரிய” மனிதர்களாய்
உலா வருகிறார்கள்….?
.
என்பது பற்றியெல்லாம் எழுதுவாரென்று
எந்த முட்டாளும் எதிர்பார்க்க முடியாது.
.
ஏனென்றால் அவர் இருக்குமிடம் அப்படி.
.
இந்த தேசிய ஒருமைப்பாட்டுப் புலம்பல்வாதிகள்
மீண்டும், மீண்டும் முழங்குவது :
வடநாட்டிலிருந்து வந்து
இங்குள்ள மக்களைச் சுரண்டும் முதலாளிக்கும்…

இங்கிருந்து அங்குபோய்
அங்குள்ள மக்களின் உழைப்பைச் சுரண்டும்
முதலாளிக்கும் இடையிலான
ஒருமைப்பாட்டைத்தான்.
.
மற்றபடிக்கு
தனது கிழிந்த சேலையில் மரக்கிளையில் தூளி கட்டி
மழலையைத் தூங்க வைத்துக்
கல்லுடைக்கப் போகும் ஏழைக் கொத்தடிமைக்கும்….
.
ஒரிசாவிலும், பீகாரிலும் பசிக் கொடுமையால்
விஷச் செடிகளை உண்டு ஊனமாகிப் போன
மக்களுக்கும் இடையிலான
ஒருமைப்பாட்டை அல்ல.
.
ஏனெனில் நிலைமை மாறாது
என்ற எண்ணம் இவர்களுக்கு.
.
“மாறாது என்ற சொல்லைத் தவிர
அனைத்தும் மாறிக்கொண்டேயிருக்கும்” என்று
பத்தொன்பதாம் நூற்றாண்டின் இறுதியில்
ஒரு மனிதன் சொல்லிப் போனான்.
.
இங்குள்ள சோத்துக்கற்ற கூட்டமும் ,
அங்குள்ள சோத்துக்கற்ற கூட்டமும்
இணையும் காலம் விரைவில் வரும்.
அப்போது இங்குள்ள அவதார புருஷர்கள்
துண்டைக் காணோம், துணியைக் காணோம் என்று
எடுப்பார்கள் ஓட்டம்.
.
அப்போது இந்த “அக்னி”கள்
“பாம்குரோவ்” ஓட்டல்களில் நடக்காது.
.
ஏனென்றால் சேரிப்பகுதிகளின்
அக்னிச் சூட்டில்
அவைகள் எரிந்து சாம்பலாகியிருக்கும்.
.
.
( 1988 இல் வெளிவந்த எனது
முதல் தொகுப்பான
“அன்புத் தோழிக்கு,” நூலில் இருந்து….)
.
.

தாய்….


வாழ்க்கையையே அடியோடு புரட்டிப் போட்ட….
அப்படியே தலைகீழாக மாற்றிவிட்ட நூல்
என்று எதையும் குறிப்பாகச் சொல்ல முடியாவிட்டாலும்
பல நூல்கள் அப்பங்களிப்பைச் செய்தன
என்று வேண்டுமானால் சொல்லலாம்.
.
பள்ளி கல்லூரிப் பருவங்களில்
புஷ்பா தங்கதுரை…
ராஜேஷ்குமார்…
சுஜாதா…
பாலகுமாரன் போன்றோரின்
கதை படித்து வளர்ந்த ஜாதிதான்
என்றாலும் அதில் கொஞ்சம்
U TURN போட வைத்தவர் ஜெயகாந்தன்
என்றும் சொல்லலாம்.
.
ஆனால்
எண்பதுகளின் தொடக்கத்தில்
அறிமுகமான ஈழத்து இலக்கியம்
ரத்தமும் சதையுமான மனிதர்களை
கண்முன்னே கொண்டு வந்து நிறுத்தியது.
.
செ.யோகநாதன், கணேசலிங்கன், அருளர் என
எண்ணற்றோரது படைப்புகள்
என்னை மேலும் செப்பனிடச் செய்தன.
அதே கால கட்டத்தில் அறிமுகமானதுதான்
இடதுசாரி இலக்கியமும்.
.
கையில் நூறு ரூபாயோடு என்.சி.பி.எச் போனால்
ஒரு லாரி நிறைய புத்தகங்களை
வாங்கி வரலாம் அன்றைக்கு.
.
அப்படி வாசிக்கத் தொடங்கியதுதான்
நிரஞ்சனாவின் “ நினைவுகள் அழிவதில்லை”,
ராகுல்ஜியின் “பொதுவுடைமை என்றால் என்ன”?,
ஜூலியஸ் பூசிக்கின் “தூக்குமேடை குறிப்பு” போன்றவை.
.
ஆனால்
இவற்றிலெல்லாம் தலையாயதும்
எனது தனிப்பட்ட குணநலன்களை
ஓரளவுக்கு வடிவமைத்ததும் ஆன புத்தகம்
என்று சொன்னால் அது
மார்க்சிம் கார்க்கி எழுதிய “தாய்” நாவல்தான்.
.
மனிதர்களைச் சக்கையாகப் பிழிந்து
வெளியில் தள்ளும் அந்தத் தொழிற்சாலை….
.
அந்த ஆலையின் அடித்தளமே
தாங்கள்தான் என்பதை உணராது
குடியும் சச்சரவுமாய்க் கழியும்
தொழிலாளர்களின் குடியிருப்புகள்…
.
மனைவிகளையும் தாய்களையும் அடித்து உதைத்து
துவம்சம் செய்யும் கணவன்கள்… பிள்ளைகள்….
.
இவற்றுக்கு நடுவே
தகாத ஒரு வார்த்தை கூட பேசாது
மென்மையாக நடந்து கொள்ளும் மகன் பாவெல்….
.
அவனது கண்ணியமிகு நண்பர்கள்….
.
அவர்கள் கூடிக்கூடி வாசிக்கும் நல்ல நல்ல நூல்கள்…
.
இதுதான் அந்தத் தாயை
ஆச்சர்யம் கொள்ளவும் வைக்கிறது
சில வேளைகளில் அச்சம் கொள்ளவும் வைக்கிறது.
.
இந்நாவலை வாசித்த காலகட்டங்களில்
அந்தப் பாவெல்லாகவே நாமும் மாற மாட்டோமா
என்கிற ஏக்கமும் நம்முள்ளே எழும்.
.
அதைவிடவும்
இத்தகைய இடதுசாரி இலக்கியங்களை
வாசிக்கும்போது வரும் ஒரு Side Effect
ஒன்றும் உண்டு.
அதுதான் இத்தகைய நூல்களையும் வாசித்துவிட்டு
இங்குள்ள மரபான “கம்யூனிஸ்டுகளை”க்
கண்டு குழம்பிப் போவது.
.
ஆனால் ஆரம்பத்திலேயே எனக்கு
அந்தச் சிக்கல் எழவில்லை
என்றுதான் சொல்ல வேண்டும்.
.
கம்யூனிசம் என்கிற அந்த உன்னத தத்துவம் வேறு….
உள்ளூர் எதார்த்தம் வேறு என்கிற புரிதல்தான் அது.
.
மார்க்சிம் கார்க்கி போன்றோரது இத்தகைய படைப்புகள்தான்
வர்க்க உணர்வோடு இம்மண்ணையும்
இம்மக்களையும் பார்க்கக் கற்றுக் கொடுத்தது.
.
அதுதான் :
கம்யூனிச மனநிலையில் வாழ்வதென்பது வேறு….
கட்சி மெம்பராக வாழ்தல் வேறு
என்கிற உண்மையையும் சொல்லித் தந்தது.
.
ஆக…
பாவெல்லின் தாயே என்னுள் இன்றும்
தாயாக வாழ்ந்து கொண்டிருக்கிறாள்.
.

.
நன்றி : ”அந்திமழை” மாத இதழ்